للعاقلين و بس (تهيس و عبط غير عادى )

القصة دي قصة واحد كان بيحب واحدة وكالعادة قلبته اقروها وربنا معاكم.
.................................................. .
مرة كنت قاعد مع نفسي لقيتها بتكلمني (نفسي) وبتقولي : ايه ياعم الحاج مالك كده عايش دور الاحباط وعامل فيها مكتئب كده ليه؟
انا: معلش يانفسي اصل انا زي اللي بيقولوا عليه اللي حب ولا طالشي .

نفسي: وايه يعني خيرها في غيرها واللي باعك بيعه وشيله من دماغك خالص .

انا: صعب قوي اصلي كنت بموت بموت فيها ولغاية دلوقتي مش عارف افكرغير فيها.
نفسي: يابني ياحبيبي اللي مايفكرش فيك دقيقة مايستاهلش تفكر فيه ثانية

انا: بقولك ايه ابعدي عني بكلامك المكعبل ده مش ناقص قرف

نفسي: اهدى بس وقولي مين السبب ؟

انا: هو فيه غيره قلبي طبعا اللي بيموت من غيرها.

رنة صغيرة علي الموبايل جالنا قلبي في المكان اللي كنا قاعدين فيه

قلبي: خير ياجماعة في ايه قلقتوني والله ؟
نفسي(بألاطة): لا عادي عايزين نسالك شوية اسئلة كده ممكن؟

قلبي: معنديش مانع بس بسرعة ورايا دورة دموية عايز الحق اخلصها قبل المصارعة ما تبدأ
نفسي: قولي ياسيدي انت ليه خليته يحب( .......) ؟

قلبي (بقرف): وانا مالي ؟ هو اللي عبيط وبيحي علي روحه وكل مايشوف بنت يتحايل عليا ويبوس ايدي علشان احبها وانا ماحبش اكسفه

انا (بثورة): انا بعمل كده يا جزمة يا ابن( ......)

قلبي(مقاطعا): لا لا ياكوتوموتو كله الا الغلط احترم نفسك بدل ما اربيك

انا(بشراسة): حاتعمل ايه يعني؟

قلبي(بخبث): حافتح الدفاتر القديمة ايه رايك؟

انا(باحراج): لالا خلاص حقك عليا ماتفضحنيش ابوس ايدك .

قلبي(بعوجان): خلاص خلاص حصل خير.

انا(في سري): وربنا لوريك يابن(......)

قلبي: سامعك احترم نفسك والا(.....)

انا(بخوف): خلاص خلاص متاسف

نفسي(بعد ماصحيت من النوم): واضح انكم مش عاملين احترام لوجودي.

انا(بغيظ): صباح الخير ياحجة .

نفسي: بس يا زفت.

انا: طيب
نفسي: نرجع لموضوعنا ليه خليته يحبها ؟

قلبي: وانا مالي ماتساله عنيه ما هي اللي شافتها .

رسالة صوتية لعنيا جت بسرعة

عنيا: ايه ياجماعة مالكم شكلكم مضايق خير؟

نفسي(بقسوة وكلاء النيابة): ليه خليتي الهباب ده يحب البنت دي

عنيا: وانا مالي القلب هو اللي بيحب انا ببص بس

قلبي: ماتستعبطيش مش انت اللي قولتيلي علشان اخليه يحبها

عنيا: .......................(اصل الرقابة حذفت الكلام)

نفسي: ردي حصل الكلام اللي القلب بيقول عليه ؟

عنيا: ايوة اتنيل حصل.

انا: ليه ياعنيا؟

نفسي(بقسوة): اخرس خالص لغاية ما اقولك تتكلم.

انا(بخوف): حاضر

نفسي: وبعدين ايه الأسئلة التافهة دي؟

انا: عندك حق

نفسي: قوليلي ياعيون ليه عملتي كده؟

انا: حسبي الله ونعم الوكيل

قلبي ونفسي وعنيا(مع بعض): اخرس يا كلب

انا: طيب يا ولاد .......( برضه الرقابة شالته)

نفسي: ردي علي السؤال.

عنيا(باحراج): اصلها كانت حلوة وامورة وزي العسل

نفسي: وهي اي واحدة حلوة تخلي القلب يحبها

عنيا: لا طبعا بس انا اتشديت ليها لان كان فيها حاجات كتير حلوة

نفسي :زي ايه قولي ده انتي شكلك مصيبة ؟

عنيا: عنيها

نفسي(باحباط): وايه كمان يا عم كاظم ؟

عنيا: ضحكتها ,بصتها ليا اللي كانت بتنسيني الدنيا كلها وحاجات تانية كتير كانت بتخليني اموت فيها واتمني اني اشوفها كل يوم ال25 ساعة

انا(مقاطعا): ازاي اذا كان هما 23 بس

عنيا: اخرس يا حمار قصدك يعني ان انا جاهلة

انا: لا العفو انا اللي جاهل

عنيا: طبعا انت جاهل

انا: ربنا يسامحك

عنيا: وبعدين بدل ماتحاكموني ماتسألوا العقل مش هو اللي وافق علي الموضوع؟

نفسي: عندك حق نادوا علي العقل

راح قلبي يجيب عقلي واقعدنا احنا نتكلم شوية عن راينا في انفلونزا الطيور واثرها علي صناعة السينما في مصر, وبعد ما اتهبلنا جالنا العقل لوحده

عقلي: ما شاء الله مالكم كلكم ملمومين كده ليه خير؟

انا: خير ايه هو احنا بنتلم غير في المصايب ؟

نفسي: اسكت انت ,امال فين القلب ياعقعق(دلع عقل)

عقلي: مش عارف قالي خمسة وجاي

دخل علينا قلبي مسرعا وهو بينهج

عنيا: كنت فين يابني ؟

قلبي: ابدا كنت بخلص الدورة الدموية وجيت عالطول ,اتغديتوا ياجماعة ؟

نفسي: لا لسه , جعان يازفت؟

انا: جعان جدا والله
طلبنا تشيكن رول(علشان تجيلنا انفلونزا طيورونخلص بس للاسف الفراخ طلعت سليمة)

العقل: الحمدلله سفرة دايمة ياجماعة

انا: الف شكر

عنيا: وانت مالك انت ده بيكلم النفس صح؟

عقلي: لا انا بكلمه هو

انا(بضحك): هاها كبسة

عنيا(بقرف): قلة ادب

نفسي: بس خلاص مش عايزة نفس, ليه ياعقل وافقت انه يحبها؟

عقلي: لقيته ملهوف عليها وعنيا وقلبي اتحايلوا عليا وقالولي دي حاتبقي اخر مرة شكلها هي كمان بتحبه فاوافقت علشان ما يزعلش

نفسي: ياريتك كنت زعلته علي الاقل ماكانش حتبقي حالته كده

انا(باكيا): اه والله ياريتك

عقلي: علي العموم حصل خير واديك اتعلمت حاجة جديدة صح؟

انا(بغباء): لا ما اتعلمتش

عقلي(بغيظ): يعني مفيش حاجة ناوي تبطل تعملها اللي حصل ده؟

انا(بتخلف): حاجة زي ايه يعني

عقلي: ياحمار يعني ناوي تحب تاني

انا: اه .... طبعا لا ولا حافكر تاني احب

عقلي(برضا): برافو كده انا احبك, يعني عرفت اخيرا ان مفيش حاجة اسمها حب؟

انا(بتردد): طبعا طبعا , بس انا عايز اقول حاجة.

عقلي: اتفضل

انا: انا قبل ما اعمل اي حاجة في الحوار ده اتكلمت مع نفسي وهي اللي شجعتني اعمل كده

نفسي(بذهول): انا يا حيوان

انا: ايوة انتي اللي خلتيني اوافق منك لله ياشيخة

عقلي: حصل الكلام ده يابت

نفسي: ايوة بس...

عقلي (مقاطعا): مابسش حصل ولا ماحصلش؟

نفسي(باستسلام): حصل

عقلي: انا حاخد ساعة تعسيلة وبعدين حاجي اقولكم القرار النهائي في الحوار المعفن ده

بعد خمس ساعات رجع عقلي وهو بيتاوب

عقلي: مساء الخير ياجماعة

انا(بغيظ): وعليكم السلام , كل دي ساعة

عقلي: براحتي عندك مانع؟

انا(بخوف): لا طبعا براحتك يامعلم

عقلي: جتكم القرف مليتوا البلد.

نفسي(بقلق): اخدت قرارك ياعقل؟

عقلي: طبعا

عنيا: اتفضل قول قلقتنا

عقلي: بعد سماع اقوال الشهود والمتهمين في قضية اااااا....... والله ماعارف اسمها قضية ايه

انا(باستعجال): ماعلينا عديها يابا

عقلي: في قضية ماعلينا عديها يابا ( ايه الاسم الغريب ده؟)

نفسي(بغيظ): خلص

عقلي: المهم قررت انا العقل الاتي

وقبل مايقول احكامه عليا دخل اللسان وقال : انا لسان حضرته حاضر للدفاع عنه

عقلي: اتفضل سمعنا دفاعك؟

لساني: المتهم ياسيدي الفاضي برئ ,نحن نعترف انه احب ولكن ما العيب في الحب؟ ما العيب في هذا الاحساس الرقيق بالحنين والاشتياق نحو شخص معين؟ اهو حرام؟ ام هو عيب ؟ انه لا هذا ولا ذاك سيدي الفاضي ولكنه شعور جميل وبالتاكيد عندما يكون متبادلا فانه يجعل الحياة افضل بالنسبة للطرفين, ثم ان موكلي عندما احب سيدي الفاضي احب بموافقة ومباركة كل الاعضاء وحتي انت ياسيدي وافقت علي هذا الموضوع

عقلي: نعم ياروح امك

لساني(مستدركا): اقصد انك رضخت مجبرا لالحاح موكلي ونفسه لقلبك العطوف الملئ بالحنان

عقلي: طيب كمل ياخويا
لساني: ما اريد قوله انه اذ كان مذنبا فهم جميعا مشتركين معه في هذه الجريمة , بل يا سيدي فهم السبب الرئيسي في قيامه بهذه الفعلة الشنعاء لذلك ياسيدي القاضي فاني اطالب ببراءة المتهم من التهمة الموجهة اليه واعطاءه فرصة اخري لكي يحب مع توقيع بعض العقوبات البسيطة علي باقي المتهمين لكي يتعلموا كيفية الاختيار الصحيح فيما بعد

عقلي(وقد بدا عليه الاقتناع): تعرف يالسان انا كنت ناوي احكملهم بشوية احكام كده بس كلامك اقنعني وعلشان كده انا قررت الاتي:
1- منع النفس من الكلام او التفكير او اتخاذ القرارت والا فاني سوف اتخذ معها مايلزم من الاجراءات

2- عمل نضارة للعين بس عند دكتور المرة دي (مش حلاق زي كل مرة) علشان ماتحبش اي حد تبصله

3- حرق القلب بجاز معفن ورميه في اقرب صندوق زبالة علشان يبطل هبل

4- قطع اللسان ونفيه الي الاسكيمو علشان يتربي
وبصلي بصة كلها حنية وقالي: اما انت فقد قررت اعدامك شنقا بالرصاص علي الكرسي الكهربي علشان يكون العقاب ده درس تستفيد منه بعد كده

انا: ياللللللللللللللللللللللللللللللللللللللللللللهوي

ملحوظة مش مهمة: هذا الحوار تم اجراؤه في اوضه 203 بعنبر الخطرين بمستشفي المجانين الموجودة بمدينة السادات (جنب كلية سياحة عالطول) !
.......................................

طبعا انا خليت العنوان للعاقلين وبس علشان يبقي اغراء يخلي الكل يقراه لأن احنا (ما شاء الله) كلنا فاكرين ان احنا عاقلين , وكده يبقي انا ضربت حجرين بعصفور واحد ! الاول ان كل الناس حاتقراها , والثاني ان مدام اللي حايقروها عاقلين (في المشمش) فهما وبأذن الله حايتهبلوا بعد مايقروها والله الموفق.
.........................................

ههههههههههههههههههههههههههههه
هههههههههههههههههههههههههههههه

يخرب عقلك يا اسراء

ايه يا بنتي الهبل ده

منتهى التهييس والله

تسلم اديكي بجد على التحفه دي

[size=24]ههههههههههههههههههههههههههههههههه
والله نفسه دى تمام واخر تهييس
نفسلى يكون عندى نفس شبه نفسه كدا ههههههههههههه
تسلم ايدك يا روئه تهييس جامد هههههههه[/size]

ههههههههههههههههههههههههههههههههههههههههههههههههههههههههه
يحرقك ربنا هههههههههههههههههه

MoOoDeEe كتب:: ههههههههههههههههههههههههههههه
هههههههههههههههههههههههههههههه

يخرب عقلك يا اسراء

ايه يا بنتي الهبل ده

منتهى التهييس والله

تسلم اديكي بجد على التحفه دي

هههههههههههههههههههه اى خدعه يا مودى نورت التوبيك يا عثووووووول

HEMA STAR كتب:: [size=24]ههههههههههههههههههههههههههههههههه
والله نفسه دى تمام واخر تهييس
نفسلى يكون عندى نفس شبه نفسه كدا ههههههههههههه
تسلم ايدك يا روئه تهييس جامد هههههههه[/size]

انت كلامك هيسنى ازلا اكتر مانا هههههههههههههه والله نفسه موث تغلى عليك خدهااااااا

منورنى والله يا هيما

ahmed dabash كتب:: ههههههههههههههههههههههههههههههههههههههههههههههههههههههههه
يحرقك ربنا هههههههههههههههههه

ويحرفك انت كومان قادر يا كريم يارب قول امييييييييييييييييين هههههههههههههههه

مضلم التوبيك اقصد منور يا بصل يووووووووووه اقصد يا عثل